Многу не’ израдува веста дека актуелниот роман „Засолниште во времето“ ја доби Интернационалната награда „Букер“, во превод на англиски јазик на Анџела Родел. Со годинашното жири претседаваше француско-мароканската писателка Лејла Слимани, а победникот беше објавен синоќа (23 мај), на специјалната вечер во Лондон.

Букеровата награда е најважниот настан во литературниот и издавачкиот свет. Се доделува од 1969 година, а нејзини носители се Салман Ружди, Маргарет Атвуд, Казуо Ишигуро, Џулијан Барнс… Во 2005 година, меѓународната награда „Букер“ почна да се доделува само за книги во превод. Прв добитник е Исмаил Кадаре. Наградата е вредна 50.000 фунти и се дели помеѓу авторот и преведувачот на победничката книга.

Номинацијата за меѓународниот „Букер“ е уште едно признание за Георги Господинов и романот „Засолниште во времето“. „Њујоркер“, „Гардијан“ и „Фајненшл тајмс“ веќе го прогласија делото за една од најбитните книги во 2022 година. Господинов ја доби наградата „Premio Strega Europeano“ и така стана првиот писател од Источна Европа со тоа признание.

На македонски јазик, во одличен превод на Душко Крстевски, „Засолниште во времето“ ја издадовме кон крајот на 2021 година, а промоцијата во присуство на авторот се одржа на 01 декември 2022 година во киното „Фросина“ во МКЦ.

Засолниште во времето