Драги читатели,

со задоволство Ве информираме дека денес од печат излезе преводот на актуелниот роман „Загубени во слободата“ од Владимир Зарев. На тој начин, по објавувањето на „Пропаст“ и „Чудовиштето“, ова е трет роман на македонски јазик на еден од најценетите бугарски писатели, во превод на Бранислав Мирчевски.

„Загубени во слободата“ е роман кој ја истражува комплексноста на човечката слобода преку две различни, но неоспорливо поврзани временски линии. Во современиот дел на приказната, писателот го анализира влијанието на пандемија и виртуелната реалност, кои ја компромитираат индивидуалната слобода и ги затвораат луѓето во нови „затвори“ на изолација и насилство. Втората линија нè носи во Средновековието и ја истражува темата на исихазмот, древната духовна практика што се стреми кон единство со Бога.

Со оваа двојна перспектива, Зарев ја поставува основната тема: што е слобода и дали е можно да се постигне совршенство и слобода, дури и кога се наоѓаме затворени во сопствените страсти и илузии? Синергетски поврзувајќи ја современата и духовната потрага, „Загубени во слободата“ ни нуди длабока рефлексија за значењето на слободата и смислата на животот.

Книгата е објавена со поддршка на Националниот фонд „Култура“ на Р. Бугарија.