Почитувани читатели,

со радост објавуваме дека утре од печат излегува новата книга од Фросина Пармаковска насловена „Се’ уште можам нешто да сторам“. Ова е нејзина петта прозна објава, а четврти роман во наше издание, по „Вишнова хроника“, „Одбројување“ и „На враќање“.

Се надеваме дека ќе уживате и во новиот возбудлив ракопис на Пармаковска, која во 2017 година ја доби наградата „Роман на годината“ на Фондацијата „Славко Јаневски“ за „Одбројување“.

Прозното мајсторство на писателката го доловуваме преку еден извадок од новиот роман:

„ …јас никако не успевав да се ослободам од чувството дека исчезнувам. Кога почнував да зборувам, моите зборови наместо до ушите на присутните, се протнуваа низ еден, за нив недостапен тунел, излегувајќи токму на лисјата од дрвата пред нас, патуваа носени од ветрот преку грмушките што го обрабуваа тревникот во нашиот видик, сѐ до излезот на паркот, право во контејнерите на уличката.

Исто беше и со мојот лик, моето тело што се замрзнуваше и стануваше само рамка од неподвижна слика, толку несмасно потпрена на штиците од клупата, што сите околу мене се наведнуваа и ги искривуваа вратовите само за да ја избегнат додека се обидуваат меѓу себе да се гледаат. Тие избегнуваа да гледаат во мене, ме заобиколуваа како да бев јас некаква препрека.

А јас, без мојот глас и присуство и без само мојот образ, немоќно тонев во лулката која висеше на дебел синџир и осцилираше помеѓу ѕидот на конфузноста во кој сите тие денови си ја удирав главата и оној на бесот поради моето исчезнување што сега толку моќно ја обземаше секоја во мене присутна клетка“.